Make your own free website on Tripod.com
ຍິນ​ດີ​ຕ້ອນ​ຮັບ​ສູ່​ເວັບ​ພາ​ສາ​ລາວ​
| ກັບ​ຄືນ​ ເວັບ​ໜ້າ​ທໍາອິດ | ລະ​ບົບ ແລະ​ຊອບ​ແວ​ທີ່​ໃຊ້ | ການ​ສ້າງ Folder/Directory | ການ​ນໍາ​ເອົາ​ຮູບ​ພາບ​ເຂົ້າ​ໃສ່​ໜ້າ​ເວັບການ​ສ້າງ​ແຖບ​ຫົວ​ຂໍ້​/ເມ​ນູ ການ​ສ້າງ​ການ​ເຊື່ອມ​ຕໍ່ |
  ບໍ່ມີ​ໃຜ​ຈະ​ຢູ່​ຄໍ້າ​ຟ້າ​, ມີ​ພຽງ​ຄຸນ​ງາມ​ຄວາມ​ດີ​ເທົ່າ​ນັ້ນ ທີ່​​ຄົນ​ລຸ້ນ​ຫຼັງ​ຈະ​ຈາ​ລຶກ​ໄວ້​ຕະ​ຫຼອດ​ໄປ.
  ການ​ເມືອງ ​ມັກ​ຖືກ​ໃຊ້​ໄປ​ໃນ​ທາງ​ທີ່​ຜິດ​ຄື​: ໃຊ້​ເປັນ​ເຄື່ອງ​ມື​ເພື່ອ​ຮັກ​ສາ​ອໍາ​ນາດ ຂອງ​ຜູ້​ທີ່​ຄອບ​ຄອງ​ອໍານາດ ຫຼື​ຖືກ​ໃຊ້​ເປັນ​ເຄື່ອງ​ມື​ ເພື່ອ​ຢຶດ​ເອົາ​ອໍາ​ນາດ ຂອງ​ຜູ້​ທີ່​ສະ​ແຫ​ວງ​ຫາ​ອໍາ​ນາດ.
   ຜົນ​ຈາກ ​ການ​ໃຊ້​ການ​ເມືອງ​ໄປ​ໃນ​ທາງ​ທີ່​ຜິດ​ ເຮັດ​ໃຫ້​ບຸກ​ຄົນ ທີ່​ບໍ່​ມີ​ສ່ວນ​ກ່ຽວ​ຂ້ອງ​ ໄດ້​ຮັບ​ຄວາມ​ເຈັບ​ແສບ ຍ້ອນ​ກາຍ​ເປັນ​ເສັ້ນ​ທາງ ​ໃຫ້​ບຸກ​ຄົນ​ອື່ນ​ ຢຽບ​ຍໍ່າ​ເພື່ອ​ກ້າວ​ໄປ​ສູ່​ອໍາ​ນາດ.
  ມີ​ໃຜ​ຮູ້​ແດ່​ບໍ່​ວ່າ​, ໜ້າ​ທີ່​ແທ້​ຈິງ​ຂອງ​ການ​ເມືອງ​ຄື ເຮັດ​ໃຫ້​ຄົນ​ຮູ້​ຈັກ​ສິດ ແລະ​ໜ້າ​ທີ່​ຂອງ​ຕົນ​ໃນ​ສັງ​ຄົມ​ ໃນ​ຖາ​ນະ​ທີ່​ເປັນ​ສ່ວນ​ປະກອບ​ໜຶ່ງ ​ຂອງ​ສັງ​ຄົມ.
  ຖ້າ​ຄຶດ​ວ່າ​ ສິ່ງ​ທີ່​ກໍາ​ລັງ​ເຮັດ​ ແມ່ນ​ເພື່ອ​ຜົນ​ປະ​ໂຫຍດ​ ຂອງ​ຄົນ​ສ່ວນ​ໃຫຍ່​, ໃຫ້​ດໍາ​ເນີນ​ການ​ເຮັດ​ໄປ​ໂລດ ໂດຍ​ບໍ່​ຕ້ອງ​ສົນ​ໃຈ​ຄໍາ​ຄັດ​ຄ້ານ​ທ້ວງ​ຕິງ​ ຂອງ​ໃຜ; ແຕ່​ຕ້ອງ​ໃຈ​ກ້​ວາງ​ພໍ ທີ່​ຈະຍອມ​ຮັບ​ໃນ​ຜົນ​ທີ່​ຕາມ​ມາ ຊຶ່ງ​ອາດ​ຖືກ​ປະ​ນາມ​ກົ່ນ​ດ່າ ​ວ່າ​ເປັນ​ທໍ​ລະ​ລາດ ຫຼື​ອາດ​ຖືກ​ຍ້ອງ​ຍໍ​ຊົມ​ເຊີຍ​ວ່າ​ເປັນ​ວິ​ລະ​ຊົນ.
  ຢ່າໄດ້​ຄຶດ​ພຽງ​ແຕ ່​ເຂົ້າ​ຂ້າງ​ຕົນ​ເອງ​ວ່າ​ ບໍ່​ມີ​ເຮົາ​ຈັກ​ຄົນ​ໜຶ່ງ​, ບ້ານ​ນີ້​-ເມືອງ​ນີ້ ຈະ​ຕົກ​ຕໍ່າ​ລົງ​ໄປ​ ແຕ່​ໃຫ້​ລອງ​ຄຶດ​ກັບ​ປີ້ນ​ເບີ່ງ​ວ່າ ບໍ່​ມີ​ເຮົາ​ຈັກ​ຄົນ​ໜຶ່ງ​, ແຜ່ນ​ດິນ​ນີ້ ຈະ​ສູງ​ຂື້ນ​ຈັກ​ຂໍ້​ມື?
  ຊີວິດ​ເຮົາ​ແມ່ນ​ມີ​ຄຸນ​ຄ່າ​, ຢ່າ​ປ່ອຍ​ໃຫ້​ຕາຍ​ຖິ້ມ​ລ້າ ໃນ​ທ້ອງ​ຖະ​ໜົນ.
                                          

ລະບົບປະຕິບັດການ ແລະຊອບແວ (ໂປຣແກຣມນຳໃຊ້) ທີ່ຈຳເປັນ
ການ​ ຂຽນ​ເວັບ​ໄຊ​ພາ​ສາ​ລາວ ຈຳ​ເປັນ​ຕ້ອງ​ໃຊ້​ຄອມ​ພິວ​ເຕີ. ເນື່ອງ​ຈາກ​ຄອມ​ພິວ​ເຕີ​ສ່ວນ​ໃຫຍ່​ຢູ່​ໃນ​ປະ​ເທດ​ລາວ (99%) ແມ່ນ​ໃຊ້​ລະ​ບົບ​ປະ​ຕິ​ບັດ​ການ​ຂອງ Windows ຊຶ່ງ​ມີ​ນັບ​ຕັ້ງ​ແຕ່ Win 95 ເຖີງ Win ME ແລະ Win NT4 ເຖີງ Win XP. ດັ່ງ​ນັ້ນ, ຄົນ​ລາວ​ທີ່​ຮູ້​ໃຊ້​ຄອມ​ພິວ​ເຕີ, ຈະ​ມີ​ຄວາມ​ຄຸ້ນ​ເຄີຍ​ກັບ​ລະ​ບົບ​ປະ​ຕິ​ບັດ​ການ​ຂອງ Windows ບໍ່​ລຸ້ນ​ໃດ​ກໍ່​ລຸ້ນ​ຫນຶ່ງ​ທີ່​ໄດ້​ກ່າວ​ມາ. ຈິງ​ຢູ່​ທີ່​ວ່າ ນອກ​ຈາກ​ລະ​ບົບ​ປະ​ຕິ​ບັດ​ການ Windows ແລ້ວ, ຍັງ​ມີ Unix, Mac OS, Linux ແລະ​ອື່ນໆ, ແຕ່​ທັງ​ຫມົດ​ຂອງ​ລະ​ບົບ​ປະ​ຕິ​ບັດ​ການ​ເຫຼົ່າ​ນີ້, ມີ​ຈຳ​ນວນ​ຄອມ​ພິວ​ເຕີ​ບໍ່​ເຖີງ 1% ຂອງ​ຈຳ​ນວນ​ຄອມ​ພິວ​ເຕີ​ທັງ​ຫມົດ​ທີ່​ມີ​ໃນ​ລາວ. ຜູ້​ຂຽນ​ເອງ​ທີ່​ໃຊ້​ຄອມ​ພິວ​ເຕີ​ມາ​ເກືອບ 18 ປີ, ຍັງ​ບໍ່​ທັນ​ມີ​ວາດ​ສະ​ຫນາ​ໄດ້​ບາຍ ຫຼື​ໄດ້​ໃຊ້​ຄອມ​ພິວ​ເຕີ Mac in Tosh ເລີຍ, ສ່ວນ​ລະ​ບົບ​ປະ​ຕິ​ບັດ​ການ Linux, ກໍ່​ຍັງ​ບໍ່​ທັນ​ເຫັນ​ຕົວ​ຈິງໆ​ເທື່ອ, ເຫັນ​ແຕ່​ໃນ​ຮູບ. ດັ່ງ​ນັ້ນ ຈະ​ບໍ່​ຫນ້າ​ປະ​ຫຼາດ​ໃຈ​ເລີຍ ທີ່​ຄົນ​ໃຊ້​ຄອມ​ພິວ​ເຕີ​ໃນ​ລາວ​ສ່ວນ​ໃຫຍ່ ຈະ​ບໍ່​ຮູ້​ຮອດ​ວ່າ ມີ​ລະ​ບົບ​ປະ​ຕິ​ບັດ​ການ​ເຫຼົ່າ​ນີ້​ໃນ​ໂລກ! ຂ້າ​ພະ​ເຈົ້າ​ເອງ ກໍ່​ສຳ​ນຶກ​ຢູ່​ວ່າ Mac OS ແມ່ນ​ເຫນືອ​ຊັ້ນ​ກ່ວາ Windows ແລະ Linux ແມ່ນ​ຫນ້າ​ສົນ​ໃຈ ເພາະ​ເປັນ​ຂອງ​ຟຣີ. ຖ້າ​ຈະ​ໃຫ້​ຂ້າ​ພະ​ເຈົ້າ​ຮຽນ​ຮູ້​ລະ​ບົບ​ປະ​ຕິ​ບັດ​ການ​ສອງ​ຕົວ​ນີ້​ຕື່ມ, ຂ້າ​ພະ​ເຈົ້າ​ຄິດ​ວ່າ ຕົນ​ເອງ​ຄົງ​ບໍ່​ພ້ອມ. ສິ່ງ​ນີ້ ອາດ​ສະ​ທ້ອນ​ໃຫ້​ເຫັນ​ອຸບ​ປະ​ນິ​ໃສ​ບາງ​ຢ່າງ​ຂອງ​ຄົນ​ລາວ​ທີ່​ມີ​ຢູ່​ໃນ​ຕົວ ​ຂອງ​ຂ້າ​ພະ​ເຈົ້າ: ຄ້າຍໆ​ກັບ​ວ່າ ການ​ປ່ຽນ​ແປງ​ສິ່ງ​ທີ່​ຄົນ​ລາວ​ຄຸ້ນ​ເຄີຍ ແມ່ນ​ເປັນ​ໄປ​ໄດ້ ແຕ່​ເປັນ​ເລື່ອງ​ຍາກ. ກໍ່​ພໍໆ​ປານ​ກັນ​ກັບ​ການ​ທີ່​ຈະ​ໃຫ້ ຄົນ​ລາວ​ທີ່​ເຄີຍ​ກິນ​ເຂົ້າ​ຫນຽວ-​ປາ​ແດກ​ມາ​ແຕ່​ນ້ອຍ ໄປ​ກິນ​ເຂົ້າ​ຈີ່-​ນ້ຳ​ມັນ​ເບີ​ແທນ.
    ດັ່ງ​ນັ້ນ, ເມື່ອ​ຄຳ​ນຶງ​ຕໍ່​ກັບ​ສິ່ງ​ທີ່​ໄດ້​ນຳ​ສະ​ເຫນີ​ຢູ່​ຂ້າງ​ເທີງ​ແລ້ວ, ຕໍ່​ກັບ​ຄຳ​ຖາມ​ທີ່​ວ່າ ຄອມ​ພິວ​ເຕີ​ທີ່​ຈະ​ໃຊ້​ຂຽນ​ເວັບ​ໄຊ​ພາ​ສາ​ລາວ ຄວນ​ຕ້ອງ​ແລ່ນ​ດ້ວຍ​ລະ​ບົບ​ປະ​ຕິ​ບັດ​ການ​ໃດ? ແມ່ນ​ມີ​ຄຳ​ຕອບ​ຄື Windows! Windows ໃດໆ​ກໍ່​ໄດ້ ພຽງ​ແຕ່​ຢ່າ​ແມ່ນ Windows 95 ລົງ​ໄປ​ກໍ່​ເປັນ​ພໍ ເພາະ​ລຸ້ນ​ເຫຼົ່າ​ນັ້ນ ຍັງ​ບໍ່​ທັນ​ສະ​ຫນັບ​ສະ​ຫນູນ​ຢູ​ນີ​ໂຄດ​ເທື່ອ (ຫມາຍ​ຄວາມ​ວ່າ ພວກ​ມັນ​ບໍ່​ເຂົ້າ​ໃຈ​ຫຼື​ບໍ່​ຮັບ​ຮູ້​ຕົວ​ອັກ​ສອນ​ທີ່​ໃຊ້​ຫນ່ວຍ​ຄວາມ​ຈຳ 2 bytes ເປັນ​ຕົວ​ແທນ​ໃຫ້​ແກ່​ອັກ​ສອນ​ແຕ່​ລະ​ຕົວ ເພາະ​ພວກ​ມັນ​ໃຊ້​ແຕ່ 1 byte ເທົ່າ​ນັ້ນ ແລະ​ຮັບ​ຮູ້​ໂຄດ​ຕົວ​ອັກ​ສອນ​ພຽງ​ແຕ່ 256 ໂຕ - ສ່ວນ Windows ລຸ້ນ 98 ຂື້ນ​ໄປ​ຈະ​ຮັບ​ຮູ້​ຢູ​ນີ​ໂຄດ, ຫມາຍ​ຄວາມ​ວ່າ​ຮັບ​ຮູ້​ຟອນ​ຢູ​ນີ​ໂຄດ​ທີ່​ໃຊ້​ຫນ່ວຍ​ຄວາມ​ຈຳ 2 Bytes ເປັນ​ຕົວ​ແທນ​ໃຫ້​ແກ່​ອັກ​ສອນ​ແຕ່​ລະ​ຕົວ - ດັ່ງ​ນັ້ນ, ຟອນ​ຢູ​ນີ​ໂຄດ​ສາ​ມາດ​ບັນ​ຈຸ​ຕົວ​ອັກ​ສອນ​ໄດ້​ເຖີງ 256 x 256 = 65536 ໂຄດ​ຕົວ​ອັກ​ສອນ ຊຶ່ງ​ສາ​ມາດ​ກວມ​ເອົາ​ຕົວ​ອັກ​ສອນ​ຂອງ​ເກືອບ​ທຸກ​ຊົນ​ຊາດ​ຊົນ​ເຜົ່າ​ໃນ​ ຫນ່ວຍ​ພິ​ພົບ​ນີ້​ໄດ້!).
    ບາດ​ນີ້, ພວກ​ເຮົາ​ຈະ​ມາ​ພິ​ຈາ​ລະ​ນາ​ນຳ​ກັນ​ວ່າ ເຮົາ​ຈະ​ໃຊ້​ໂປຣ​ແກຣມ​ຫຼື Script ໃດ​ພິມ​ພາ​ສາ​ລາວ​ອອກ​ເທີງ​ຈໍ ຫຼື​ໃນ​ໂປຣ​ແກຣມ​ນຳ​ໃຊ້​ຕ່າງໆ ແລະ​ໃຊ້​ຟອນ​ຢູ​ນີ​ໂຄດ​ລາວ​ຕົວ​ໃດ? ເຖີງ​ຈະ​ບໍ່​ຕອບ, ບັນ​ດາ​ທ່ານ ອາດ​ຈະ​ເດົາ​ໄດ້​ແລ້ວ​ວ່າ ຄຳ​ຕອບ​ແມ່ນ​ອັນ​ໃດ. ຂ້າ​ພະ​ເຈົ້າ​ຍອມ​ຮັບ​ວ່າ ບໍ່​ໄດ້​ໄປ​ສຶກ​ສາ ຟອນ​ຢູ​ນີ​ໂຄດ​ລາວ ແລະ Script ທີ່​ໃຊ້​ພິມ​ພາ​ສາ​ລາວ​ຕົວ​ອື່ນໆ  - ເຫດ​ຜົນ​ກໍ່​ຄື ຂ້າ​ພະ​ເຈົ້າ​ເຄີຍ​ໃຊ້​ເວ​ລາ​ເປັນ​ເດືອນ​ທ່ອງ​ອິນ​ເຕີ​ເນັດ ເພື່ອ​ຊອກ​ຫາ​ຄຳ​ຕອບ​ກ່ຽວ​ກັບ ການ​ແກ້​ໄຂ​ບັນ​ຫາ​ການ​ສະ​ແດງ​ຜົນ​ເທີງ​ເວັບ​ຂອງ​ພາ​ສາ​ລາວ ໂດຍ​ໄດ້​ດາວ​ໂຫຼດ​ເອົາ​ໂປຣ​ແກຣມ Keyboard Manager ຕ່າງໆ​ມາ​ທົດ​ລອງ​ໃຊ້, ຊອກ​ຄົ້ນ​ຫາ​ຟອນ​ຢູ​ນີ​ໂຄດ​ທີ່​ອາດ​ມີ​ອັກ​ສອນ​ລາວ ຊຶ່ງ​ກໍ່​ພົບ​ພຽງ​ແຕ່ Arial Unicode MS ແຕ່​ເມື່ອ​ທົດ​ລອງ​ນຳ​ມາ​ໃຊ້​ກໍ່​ຫນ້າ​ຜິດ​ຫວັງ; ຄວາມ​ຜິດ​ຫວັງ​ຕ່າງໆ​ທີ່​ເກີດ​ມີ​ຂື້ນ​ເຫຼົ່າ​ນີ້ ໄດ້​ກາຍ​ມາ​ເປັນ​ແຮງ​ກະ​ຕຸ້ນ​ໃຫ້​ຂ້າ​ພະ​ເຈົ້າ​ສ້າງ Narin.ttf ແລະ Narin Script ຂື້ນ​ມາ (ຖ້າ​ສົນ​ໃຈ​ລາຍ​ລະ​ອຽດ​ຕ່າງໆ ກະ​ລຸ​ນາ​ໄປ​ອ່ານ ບົດ​ຄວາມ "ພາ​ສາ​ລາວ ແລະ​ບັນ​ຫາ​ການ​ສະ​ແດງ​ຜົນ​ເທີງ​ເວັບ" ໃນ​ຫນ້າ​ເວັບ​ທຳ​ອິດ​ຂອງ​ເວັບ​ໄຊ http://narinsakkraj.tripod.com/). ນອກ​ຈາກ​ນີ້, narin.ttf ແລະ Narin Script ບໍ່​ໄດ້​ຖືກ​ສ້າງ​ຂື້ນ​ມາ​ເພື່ອ​ຈຸດ​ປະ​ສົງ​ທາງ​ການ​ຄ້າ ແລະ​ໄດ້​ເປີດ​ເຜີຍ​ວິ​ທີ​ການ​ໃນ​ການ​ສ້າງ ເພື່ອ​ໃຫ້​ຜູ້​ໃຊ້​ສາ​ມາດ​ເອົາ​ໄປ​ດັດ​ແປງ​ສ້າງ Script ເພື່ອ​ໃຊ້​ພິມ​ອັກ​ສອນ​ຕ່າງໆ​ໃດໆ​ກໍ່​ໄດ້ - ເມື່ອ​ພາ​ສາ​ລາວ​ທີ່ Windows ບໍ່​ໄດ້​ຮັບ​ຮູ້, ຍັງ​ສາ​ມາດ​ຖືກ​ໃຊ້​ໃນ Windows ແລະ​ໃນ​ອິນ​ເຕີ​ເນັດ​ໄດ້; ດັ່ງ​ນັ້ນ, ສຳ​ລັບ​ພາ​ສາ​ອື່ນໆ​ທີ່ Windows ບໍ່​ຮັບ​ຮູ້​ເໝືອນ​ກັບ​ພາ​ສາ​ລາວ (ບໍ່​ວ່າ​ຈະ​ເປັນ​ພາ​ສາ​ຊົນ​ຊາດ​ຊົນ​ເຜົ່າ​ໃດໆ), ພວກ​ເຮົາ​ກໍ່​ມີ​ຄວາມ​ສາ​ມາດ​ເຮັດ​ໃຫ້​ພາ​ສາ​ນັ້ນໆ ສາ​ມາດ​ຖືກ​ນຳ​ໃຊ້​ໃນ​ໂປຣ​ແກຣມ​ນຳ​ໃຊ້​ຕ່າງໆ ແລະ​ໃນ​ອິນ​ເຕີ​ເນັດ ໄດ້​ເຫມືອນໆ​ກັບ​ພາ​ສາ​ລາວ ດ້ວຍ​ວິ​ທີ​ການ​ທີ່​ໄດ້​ນຳ​ສະ​ເຫນີ​ໃນ
ບົດ​ຄວາມ "ພາ​ສາ​ລາວ ແລະ​ບັນ​ຫາ​ການ​ສະ​ແດງ​ຜົນ​ເທີງ​ເວັບ". ແມ່ນ​ແຕ່​ພາ​ສາ​ມະ​ນຸດ​ຕ່າງ​ດາວ ກໍ່​ຍັງ​ສາ​ມາດ​ເອົາ​ມາ​ໃຊ້​ໃນ Windows ແລະ​ໃນ​ອິນ​ເຕີ​ເນັດ​ໄດ້. ຂ້າ​ພະ​ເຈົ້າ​ຄຶດ​ວ່າ, ອີກ​ບໍ່​ເກີນ 2 ປີ ອາດ​ຈະ​ມີ "Windows Universal" ທີ່​ສາ​ມາດ​ໃຊ້​ພາ​ສາ​ຕ່າງໆ​ໃນ​ຈັກ​ກະ​ວານ​ນີ້​ໄດ້! ບໍ່​ແນ່​ວ່າ​ໃນ​ອະ​ນາ​ຄົດ, ອາດ​ມີ​ໃຜ​ຜູ້​ຫນຶ່ງ​ໃນ​ພວກ​ເຮົາ​ຄົນ​ລາວ ທີ່​ຈະ​ໄປ​ຊ່ອຍ​ແນະ​ນຳ Microsoft ໃຫ້​ສ້າງ "Windows Universal" ທີ່​ຈະ​ມາ​ແທນ​ທີ່ Windows 2003 ກໍ່​ເປັນ​ໄປ​ໄດ້. ສະ​ຫຼຸບ​ຄວາມ​ແລ້ວ, ຟອນ ແລະ Script ທີ່​ເຮົາ​ຈະ​ນຳ​ມາ​ໃຊ້​ໃນ​ການ​ສ້າງ​ເວັບ​ພາ​ສາ​ລາວ ຈະ​ແມ່ນ Narin.ttf ແລະ Narin Script  ເພາະ​ໃຊ້​ໄດ້​ໃນ Win 98 ໄປ​ຈົນ​ຮອດ Win XP (ຖ້າ​ໃຊ້​ກັບ XP ໄດ້, ຄົງ​ສາ​ມາດ​ໃຊ້​ໄດ້​ກັບ Win 2003 ເຊັ່ນ​ດຽວ​ກັນ).
    ສຸດ​ທ້າຍ, ພວກ​ເຮົາ​ຈະ​ມາ​ຈະ​ມາ​ເບີ່ງ​ວ່າ ຈະ​ໃຊ້​ຊອບ​ແວ​ໃດ​ເພື່ອ​ມາ​ຂຽນ​ເວັບ​ພາ​ສາ​ລາວ. ນັບ​ວ່າ​ເປັນ​ໂຊກ​ດີ​ຂອງ​ຄົນ​ລາວ ທີ່​ບໍ່​ຕ້ອງ​ເສຍ​ເງີນ​ຊື້​ຊອບ​ແວ​ຂຽນ​ເວັບ​ພາ​ສາ​ລາວ ເພາະ​ຊອບ​ແວ​ສ້າງ​ເວັບ​ໄຊ​ສ່ວນ​ໃຫຍ່​ທີ່​ຕ້ອງ​ເສຍ​ເງິນ​ຊື້ ຜັດ​ບໍ່​ສາ​ມາດ​ສ້າງ​ເວັບ​ພາ​ສາ​ລາວ​ໄດ້. ຕົວ​ທີ່​ສາ​ມາດ​ສ້າງ​ເວັບ​ພາ​ສາ​ລາວ​ໄດ້ ຜັດ​ບໍ່​ແມ່ນ​ຊອບ​ແວ​ເຕັມ​ຕົວ ແຕ່​ເປັນ​ພຽງ​ສ່ວນ​ປະ​ກອບ​ຫນຶ່ງ​ໃນ​ໂປຣ​ແກຣມ​ທ່ອງ​ເວັບ​ທີ່​ໃຫ້​ດາວ​ໂຫຼດ​ມາ ​ໃຊ້​ຟຣີ!!! ຈະ​ເປັນ​ຊອບ​ແວ​ເຕັມ​ໂຕ ຫຼື​ບໍ່​ເຕັມ​ໂຕ, ສົມ​ບູນ ຫຼື​ກຳ​ລັງ​ທົດ​ສອບ​ຢູ່​ກະ​ຊ່າງ, ເມື່ອ​ມັນ​ມີ​ຄວາມ​ສາ​ມາດ​ໃຫ້​ເຮົາ​ສ້າງ​ເວັບ​ໄຊ​ພາ​ສາ​ລາວ ເຫມືອນ​ກັນ​ກັບ​ໂປຣ​ແກຣມ​ພິມ​ເອ​ກະ​ສານ (Word Processor) ທີ່​ເຮົາ​ຄຸ້ນ​ເຄີຍ ທັງ​ຍັງ​ເປັນ​ຂອງ​ຟຣີ​ອີກ, ຖ້າ​ບໍ່​ໃຊ້​ມັນ, ຈະ​ຫາ​ຊອບ​ແວ​ໂຕ​ໃດ​ມາ​ໃຊ້​ອິກ? ດັ່ງ​ນັ້ນ, Composer ໃນ​ໂປຣ​ແກຣມ​ທ່ອງ​ເວັບ Mozilla 1.4 ຈຶ່ງ​ແມ່ນ​ໂປຣ​ແກຣມ​ທີ່​ເຮົາ​ເລືອກ​ເອົາ​ມາ​ສ້າງ​ເວັບ​ພາ​ສາ​ລາວ.
    ສະ​ຫຼຸບ​ແລ້ວ, ການ​ສ້າງ​ເວັບ​ພາ​ສາ​ລາວ​ທີ່​ນຳ​ສະ​ເຫນີ​ໃນ​ທີ່​ນີ້, ເຮົາ​ຈຳ​ເປັນ​ຕ້ອງ​ມີ:
  1. Windows 98 ຫຼື 98SE ຫຼື Me ຫຼື 2000 ຫຼື XP
  2. Narin.ttf (ຫມາຍ​​​ເຖີງ Narin.ttf ແລະ Narinbd.ttf) ແລະ Narin Script
  3. Mozilla 1.4 (ໂດຍ​ໃຊ້ Composer ເປັນ​ຕົວ​ສ້າງ​ເວັບ​ພາ​ສາ​ລາວ)
   ບໍ່​ສະ​ຫງວນ​ລິ​ຂະ​ສິດ​ໃດໆ​ທັງ​ສີ້ນ​, ສິງ​ຫາ 2003  
ຕົ້ນສະບັບຂອງຮູບພື້ນ ແມ່ນມາຈາກ http://www.etravelphotos.com/html/2002as/2002as-064-36s-w.jpg (vatphrakeo.jpg)